Por terceira vez en seis meses, foi asasinada unha líder comunitaria e ecoloxista pola súa forte oposición á minería de ouro e prata dunha empresa de Canadá no Departamento de Cabañas, O Salvador. Dende Amigos da Terra condenamos esta barbarie e esperamos que se actúe de inmediato para deter aos culpables destes asasinatos, que se levaron por diante a vida dunhas persoas cuxo único delito era defender o medio ambiente do seu país.

A ambientalista Dora Alicia Sorto Rodríguez, foi asasinada a finais de decembro, no cantón Trinidad de Sensuntepeque (Cabañas). Este crime sucedeu só unha semana despois do asasinato de Ramiro Rivera Gómez, outro líder da resistencia comunitaria aos proxectos da empresa mineira canadense Pacific Rim, en Cabañas.

Este asasinato revela a perigosa situación de Cabañas, O Salvador, onde líderes comunitarios, xornalistas de Radio Victoria, representantes de ONG´s e relixiosos que se opoñen aos proxectos de Pacific Rim son vítimas de atentados, ameazas de mortes, desaparición, torturas e asasinatos.

Con este xa son tres os ambientalistas asasinados: Gustavo Marcelo Rivera, Ramiro Rivera Gómez e Dora Alicia Sorto Rodríguez. Todos estes crimes están impunes, o cal podería motivar asasinatos de máis ambientalistas da zona. Polo tanto, urxe que a Fiscalía Xeral da República e a Policía Nacional Civil actúen de inmediato contra os autores intelectuais e materiais destas violacións aos dereitos humanos.

Púxose en marcha unha ciber-acción para demandar o Goberno de Mauricio Funes seguridade para a xente ameazada e o inicio de investigacións. Por favor participa e difunde a acción urxente.