Amigos da Terra únese aos colectivos Rabo do Galo, Grupo Naturalista Hábitat, Sociedade Galega de Historia Natural e Grupo de Anillamiento Hércules na súa denuncia das carreiras de motos acuáticas na ría de Betanzos, catalogado como Lugar de Importancia Comunitaria (LIC), debido á súa riqueza faunística.

A ría de Betanzos é un lugar ideal para que as aves constrúan nas marismas os seus niños, xa que conta coa protección da Rede Natura 2000, non obstante, as carreiras de motos acuáticas que tiveron lugar polos canais das marismas no mes de maio, puxeron en perigo este ecosistema. Debido ao ruído dos motores, as aves espantáronse, impedindo que a nidificación se desenvolvese con normalidade e coa posibilidade de perdas de carburante nas embarcacións.

Ademais, segundo a normativa que regula este tipo de vehículos, as motos acuáticas non se poden achegar a menos de 200 metros da costa en ningún caso. E tan só os propietarios das motos, non no caso das de aluguer, se poden achegar á costa para varalas, a unha velocidade inferior a 3 nudos e sempre en liña perpendicular á costa.

No referente á lexislación ambiental, estas prácticas incumpren diversos apartados da Lei de Conservación da Natureza, do decreto do Catálogo Galego de Especies Ameazadas, da Directiva Hábitats e da Directiva Aves, referidas ás molestias intencionadas á fauna nidificante ou migratoria.

A gravación feita por estas asociacións é unha proba innegable do impacto ecolóxico que ten as motos acuáticas sobre estes espazos.