Amigos da Terra participará esta fin de semana no Festival Entreculturas de Marín que da comezo mañá día 8 nesta vila pontevedresa. Serán catro días dedicados a fomentar a integración, a diversidade e a interculturalidade a través dunha pequena mostra da cultura dos diferentes continentes.

O principal obxectivo deste festival é mostrar á xente que todos/as somos produto da mestizaxe cultural produto de infinidade de migracións. Que sería da tortilla sen as patacas americanas?, que sería do gazpacho sen tomate?, que sería da empanada ou o pan sen o millo?, que sería da paella sen o arroz asiático?...e da mesma forma nas antípodas encóntranse coa mesma marabilla.

Nesta ocasión, Amigos da Terra participa o domingo por partida dobre, pola mañá sobre as 13 horas, cunha exhibición do perfecto funcionamento do forno solar e xa pola tarde, ás 18 horas, cun obradoiro de compostaxe no que repartiremos compost feito en Marín. Así mesmo, faremos difusión dos programas que estamos a levar a cabo coa Concellería de Medio Ambiente de Marín.

Unha festa diferente para un Marín Entreculturas!

Máis información