O concello de O Carballiño recibiu entre marzo e decembro de 2006, dúas partidas económicas que ascendían a 250.000 euros para obras e melloras na canceira municipal. Ditas melloras non chegaron a executarse pero a inversión dos cartos esvaeceuse.

Recentemente realizouse unha auditoría no Concello por parte de Facenda, destapando o fondo perdido ao que se destinou ese montante económico que estaba asignado para a mellora das instalacións onde se acollían aos cans da comarca.

A lamentable situación na que se atopaban os animais foi denunciada en reiteradas ocasións por Amigos da Terra, xa que a canceira carecía de servizos mínimos legalmente esixidos, como por exemplo o abastecemento de auga potable aos animais, o que deixaba translucir a carencia de inversión económica en ditas instalacións.

Na actualidade, Amigos da Terra está á espera de que se admita o recurso de apelación interposto ante a Audiencia Provincial de Ourense pola morte de máis de 70 cans atopados nunha fosa non autorizada nas dependencias da canceira o 3 de marzo do ano pasado. Todos os indicios apuntan a unha mala xestión da canceira como responsable da morte dos cans. Esperamos que esta fidedigna proba da nefasta xestión levada a cabo polo Concello, sirva para esclarecer quen son os responsables.