Augas de Galicia convocou esta primeira Mesa de participación para Galicia Sur. Durante a mesma, os diferentes axentes convidados, entre os que se atopaban Amigos da Terra e a Federación Ecoloxista Galega, puideron facer achegas á Directiva Marco da Auga (DMA) e ao inminente Plan Hidrolóxico de Conca.

Amigos da Terra fixo unha importante valoración sobre o tratamento que se da, tanto na Directiva como polo propio organismo de tutela da costa galega, ao estado ecolóxico das augas en xeral e sobre as augas subterráneas, en particular.

A queixa principal da asociación baseouse na necesidade de regular de forma máis restrictiva a contaminación das augas subterráneas tratando de “impedir”, e non de “diminuir”, dita contaminación.

Así mesmo, trataron o estado ecolóxico das augas subterráneas, xa que son as grandes esquecidas do panorama hidrolóxico. Augas de Galicia realizará un estudo específico sobre as augas subterráneas que pensa xuntar ao Plan Hidrolóxico aínda que entende que existe certa contaminación nestas augas que é imposible impedir, xa que é complexo detectar a súa entrada con antelación (problemas derivados de fosas sépticas, contaminación agraria, etc.).

Por último, Amigos da Terra solicitou o rexistro de zonas protexidas porque é o que establece a propia DMA.

As vindeiras reunións serán en outubro e decembro (en Galicia-Centro e Galicia-Norte). Se queres participar nas mesas de traballo non dubides en porte en contacto con Amigos da Terra!