Hoxe, Amigos de la Tierra Internacional, a federación de grupos ecoloxistas máis grande do mundo, conmemora o seu 40 aniversario. A federación celebrará xunto aos seus grupos e simpatizantes todos os logros conseguidos ao longo destes anos.

Esta data é, á súa vez, unha oportunidade para mirar adiante, aos próximos corenta anos, e destacar a importancia e a urxencia dunha transformación mundial cara a sociedades respectuosas co medio e socialmente xustas.

Amigos de la Tierra Internacional foi fundada en 1971 en Roslagen, Suecia, por un grupo de ecoloxistas de Francia, Suecia, Reino Unido e Estados Unidos, que viron a crecente necesidade de crear unha organización que traballase polo medio, que transcendese fronteiras. Corenta anos despois, a federación conta con 76 grupos nacionais e máis de 2 millóns de socios e seguidores en todo o mundo. A federación basea as súas campañas e posicionamentos no seu traballo coas comunidades locais. Neste sentido, Amigos de la Tierra Internacional forma parte dun movemento mundial e social que agrupa organizacións campesiñas, indíxenas, de traballo, de mulleres e de mozos.

Nnimmo Bassey, presidente de Amigos de la Tierra Internacional declarou: "Co noso traballo conxunto en todo o mundo, demostramos ás institucións e gobernos belixerantes que o camiño cara ao futuro pasa pola solidariedade entre os pobos e non pola competencia e a destrución. Estamos orgullosos de dicir que en corenta anos crecemos, somos máis persoas e temos máis forza, e continuaremos apoiando firmemente os que loitan pola xustiza social e ambiental en todo o mundo".

Os grupos de Amigos da Terra Internacional realizan campañas conxuntas sobre os problemas ambientais e sociais máis incitantes, dende a perda de biodiversidade ao cambio climático ata os agrocombustibles e a minaría. O seu traballo céntrase en reducir a influencia que exercen as políticas económicas actuais e as accións dalgunhas das multinacionais máis poderosas do mundo, así como en buscar sociedades sostibles que aseguren a xustiza ambiental e social, a dignidade humana e o respecto polos dereitos humanos e polos pobos. Amigos de la Tierra Internacional parte da convicción de que un mundo mellor é necesario e posible e continuará traballando con este fin durante os próximos corenta anos.

"O traballo da federación xunto a todos os grupos locais que a conforman representa un claro exemplo de unión para chegar a obxectivos comúns, do local ao global. É o mellor camiño para lograr un cambio real tanto nas políticas coma nas actitudes e así, conseguir unha sociedade respectuosa co medio, xusta e solidaria," declarou Liliane Spendeler, directora ambiental de Amigos de la Tierra España.

Amigos de la Tierra España, celebra estes 40 anos de logros conxuntos, que contribuíron a afianzar o traballo de cada un dos grupos da federación, coma o grupo local de Amigos da Terra Galicia. Neste sentido, a organización en Galicia e os grupos locais de España contan co apoio internacional, que enriquece as súas actividades nas áreas nas que centra o seu traballo, dando máis forza ás súas campañas de redución de residuos, xustiza climática, soberanía alimentaria e cooperación.

Producimos unha serie de materiais para conmemorar o noso aniversario, como por exemplo:

* Amigos de la Tierra Internacional, 40 anos: un informe sobre a historia da federación, as nosas principais vitorias nas últimas décadas e o noso papel no movemento mundial polo medio

http://www.foei.org/es/who-we-are/about/40o-aniversario/

* 40 Loitas e éxitos: unha recompilación de exemplos de campañas e vitorias inspiradoras dos nosos grupos membro e das comunidades coas que traballan

http://www.foei.org/es/luchas-exitos

* Artigo de opinión do Presidente de Amigos da Terra Internacional, Nnimmo Bassey, de Amigos da Terra Nixeria

http://www.tierra.org/spip/IMG/doc/articulo-de-opinion-nnimmo-bassey.doc

Fotos dispoñibles para descargar libres de dereitos:

http://www.flickr.com/photos/foei/