Amigos da Terra é un dos grupos que, xunto cunha ducia máis, manifestan a irreponsabilidade que reflicte o texto da orde de vedas 2010-2011 elaborado e consensuado pola Consellería do Medio Rural e pola Federación Galega de Caza que teñen un novo obxectivo: rematar co raposo.

Ven de ser publicada a orde de vedas 2010-2011 que emite a Consellería do Medio Rural. Nela pódese comprobar que segue en auxe a permisividade para co lobby da caza, permitíndolles cazar no monte o ano enteiro, incluíndo épocas como o verán co consecuente risco de incendios, transgresión da correspondente lei de incendios, danos ás crías da fauna e risco para os demais usuarios do monte. Pero este ano engádense uns cuantos desatinos máis.

O primeiro que chama a atención nunha orde de vedas, é que se contradiga unha lei superior, cal é a lei de caza, xa que se autorizan as batidas por danos nas zonas de adestramento de cans e nas zonas de reserva, lugares onde a lei de caza prohíbe dita actividade.

Tamén se inclúe unha relación de concellos onde a caza por danos ao xabaril, non precisa sequera de que ditos danos se comproben. Entre eles destacan concellos famosos pola súa adicación e afección aos eventos cinexéticos como campionatos e feiras, isto é Rodeiro, Portomarín, Chantada e O Incio.

Pero o máis destacado é o novo apartado que se inclúe no capítulo da caza por danos. Refírese este apartado novo á autorización de batidas por danos, contra, nada menos que os raposos.

Aos grupos que manifestamos o desacordo plural contra a orde de vedas, gustaríanos saber que tipo de danos causou ata agora o raposo e que xustifiquen a súa inclusión na actual orde de vedas e nada menos que na modalidade de caza por danos. Poderá ser cazado, tamén, mesmo en zonas de adestramento de cans e nas zonas de reserva, o cal indica o perigoso que, de súpeto, volveuse o inofensivo raposo.

A orde prevé que, antes de autorizar as batidas, os danos deben ser debidamente comprobados. Entón, como se van a comprobar danos que nunca viramos por parte do raposo?

Ignoramos se pensan mostrar a foto dunha galiña destripada, se confían na complicidade dos axentes encargados de certificalos, ou se autorizarán as batidas de maneira automática sempre que se presente unha solicitude.

É lamentable que a Consellería do Medio Rural, que debería lexislar en beneficio de toda a sociedade, accedese a incluir unha norma altamente nociva para a fauna só para atender, de forma servil e sumisa, aos caprichos dun colectivo tan depredador e letal como o da caza, con total desprezo, e sen sequera consultar aos demais axentes que tamén temos dereito a participar nestes asuntos, máxime cando a nosa meta é pór algo de sensatez nos comerciais intereses que move a caza con total desprezo polos danos que causan.

Pouco ou nada podemos facer as asociacións cando, institucións que teñen a facultade de lexislar non permiten a participación plural na regulación dunha actividade, como a caza, que afecta a toda a sociedade xa que os espazos naturais onde se executa esta actividade, é de todos e todas.