Durante as negociacións internacionais que esta semana se celebran en Barcelona sobre cambio climático, integrantes de Amigos de la Tierra procedentes de vinte países denunciaron os intentos para rematar cos obxectivos do Protocolo de Kioto.

A reunión de Barcelona é o último cumio intermedio antes da conferencia da ONU de Copenhaguen, onde se deberá decidir o acordo que substitúa o de Kioto. As posturas dos países industrializados acerca dos obxectivos de redución de emisións son insuficientes en relación ao que recomenda o Panel Intergobernamental sobre Cambio Climático (IPCC). Pretenden ademais que os países empobrecidos adopten uns compromisos de redución incompatibles coas súas posibilidades de desenvolvemento.

Por iso, activistas de Amigos de la Tierra Internacional fixeron aparecer esta mañá siluetas de cadáveres e obxectivos humanos coa mensaxe: "Non" matedes "os obxectivos de Kioto". Os negociadores internacionais observaron como as dianas humanas eran atacadas para rematar cos obxectivos de redución de emisións que representaban. Non obstante, activistas doutras ONGs uníronse a Amigos de la Tierra como escudos humanos para defender os países afectados.

Amigos da Terra España encóntrase durante esta semana coordinando as accións que conxuntamente se fan con outros grupos de Amigos da Terra Europa e Amigos da Terra Internacional, que acudiron a Barcelona a difundir a mensaxe de Xustiza Climática. Alejandro González, responsable da área de Clima e Enerxía, sinalou que "esta reunión sobre cambio climático é clave porque os países deben chegar ao cumio de Copenhaguen con moitos aspectos pechados de cara ao novo acordo. É fundamental que este compromiso obrigue legalmente aos países ricos a reducir as súas emisións drasticamente, así como a axudar aos países empobrecidos a enfrontarse ao cambio climático e garantir a súa sostibilidade. Este é o único acordo xusto, posto que os países ricos deben restituír a débeda ambiental co Sur Global".

Máis información