Amigos da Terra Internacional sinala aos países industrializados como os principais culpables de que non houbese ningún avance significativo durante as negociacións do clima.

A Secretaria de Estado, Hilary Clinton, anunciou que Estados Unidos contribuiría a un imprevisto "reparto xusto" para un fondo de 100.000 millóns para paliar o cambio climático, que non puido dar ás negociacións o empuxón que necesitan para alcanzar un acordo forte e xusto.

Erich Pica, Presidente de Amigos da Terra Estados Unidos declarou: "É bo sinal que por fin Estados Unidos estea falando de financiamento para solucionar a crise climática, pero a proposta de hoxe está baleira de contido. A cantidade anunciada quédase moi por debaixo do sinalado por Nacións Unidas. Un financiamento inadecuado condenará aos máis pobres a continuar na pobreza, mentres que o mundo sofre os desastres do cambio climático. Ademais, os préstamos e os investimentos privados non deben substituír baixo ningún concepto os fondos públicos".

Amigos da Terra cre que os Xefes de Estado aínda teñen a posibilidade de alcanzar un avance significativo, sempre que os Gobernos dos países industrializados decidan asumir as súas responsabilidades históricas e se comprometan a un acordo forte e xusto polo clima.

Nestes últimos días, non houbo ningún progreso substancial nas negociacións, e os países industrializados non teñen ningún interese en reducir as súas emisións de gases de efecto invernadoiro, nin en financiar a adaptación ao cambio climático.

Os países africanos suxeriron aumentar o financiamento en 500.000 millóns de dólares para un comezo rápido que poida romper o bloqueo.

Aínda que as discusións están baseadas nas negociacións existentes dentro do marco das Nacións Unidas, isto só foi despois dos repetidos intentos dos países industrializados de introducir novas propostas a porta pechada.

Meena Raman de Amigos de la Tierra Malasia dixo: "Os países non industrializados non son o problema aquí, eles só están preguntando polas súas obrigas aos países ricos. Isto significa confiar en novos obxectivos de redución de emisións, en liña co que a ciencia necesita, rexeitando as compensacións e achegando fondos para a adaptación dos países non industrializados".

"Os países industrializados parecen ter esquecido os novos obxectivos de redución de emisións e agora atrévense a culpar aos países non industrializados do bloqueo no Cumio. Os países ricos non poden permitir que o Cumio fracase".