O Seminario Internacional de Cambio Climático “Tecendo redes para o cambio”, celebrarase, do 3 ao 9 de xullo, no Centro de Educación Ambiental de As Corcerizas.

Este encontro, englobado dentro do contexto do programa Xuventude en Acción da Unión Europea, é apoiado pola Axencia Nacional – INJUVE e a Dirección Xeral de Xuventude e Solidariedade da Xunta de Galicia.

Un total de 25 participantes de catro países europeos das organizacións de Amigos de la Tierra España, Bélxica e Reino Unido e a asociación Oïkos de Francia, daranse cita en As Corcerizas co obxectivo de reflexionar sobre os problemas e ás posibles alternativas para frear o cambio climático.

Dentro das moitas actividades que ten previstas para estes sete días, levaranse a cabo relatorios e debates dirixidos por expertos/as e participantes que identifican alternativas de redución da pegada de carbono, e accións prácticas para cada un dos temas tratados: eficiencia enerxética, agroecoloxía, bioconstrución, denuncias ambientais, decrecemento e a produción e aplicacións do compost, entre outros.

Así mesmo, nunha das xornadas, realizarán unha visita á vila e a aula da natureza de Allariz, un proxecto co que se quere amosar que unha vida sostible dentro do rural galego é posible e por outra banda, que o propio equipamento de As Corcerizas, serviralles de exemplo práctico sobre como plantexar un modelo de vida sostible en harmonía coa natureza.

Por ultimo, e co obxectivo de que o encontro non se quede só en verbas, os participantes crearán un grupo de traballo para poder realizar no futuro proxectos xuntos.