En maio de 1994, o Concello de Vigo elaborou a súa propia normativa de protección medioambiental, que no seu apartado VI, artigos 11 e 12, establece que as árbores deben ser prioritariamente transplantadas, salvo caso de forza maior por enfermidade das mesmas. Sen embargo, as árbores que se están tallando na Rúa Martínez Garrido non teñen síntoma algún de deterioro que xustifique a súa tala, polo que o Concello de Vigo incumpre as súas propias normas de protección ambiental.

Como ditas normas contemplan o correspondente procedemento sancionador, dende Amigos da Terra confiamos en que, aínda que o procedemento parece bastante surrealista, o Concello de Vigo deberá denunciar ao Concello de Vigo e impoñerlle a correspondente multa.

Este proceso de tala inxustificada de árbores de gran porte, froito dunha mala planificación do arborado urbano, comeza a ser tan frecuente como especialmente grave, nunha cidade que mantén unha das maiores taxas de contaminación atmosférica e acústica de Galicia, unhas taxas que ditas árbores contribúen decisivamente a mitigar.

Ademais, nestes intres, noutras zonas como Areal ou Guixar, nas que tamén se están levando a cabo obras, outras árbores de gran porte están sendo ameazadas.

De ser certo o que aparece nos medios, nos que se argumenta que “os veciños e veciñas da zona de Martínez Garrido  séntense molestos por esas árbores”, se evidenciaría tamén a preocupante carencia de educación ambiental dunha parte importante da cidadanía viguesa.

Fonte imaxe: La Voz de Galicia

Ordenanzas municipais de protección do medio ambiente do Concello de Vigo