Co gallo do Día Mundial da Auga, os colectivos ecoloxistas Amigos da Terra, Adega, Federación Ecoloxista Galega (FEG), Sociedade Galega de Historia Natural(SGHN) e Verdegaia presentan un manifesto na procura dunha mudanza radical no xeito de entender a cidadanía e o conxunto das Administracións Públicas o uso deste elemento vital para a vida.

O xeito de xestionar a súa demanda tanto na faceta extractiva como de depuración reverterá na calidade do noso ecosistema e na sustentabilidade da nosa sociedade. É imprescindible acometer unha mudanza radical na xestión dos recursos hídricos que permita mellorar a calidade ecolóxica das augas litorais e continentais mediante a diminución do consumo e unha axeitada depuración, á vez que se garanta a xestión pública e o acceso colectivo a un auga de calidade.

A auga cumpre unha función ambiental e social básica, e como tal, é un ben público, polo que a súa xestión débese manter neste ámbito, fuxindo de procesos de privatización ou especulación.

O manifesto demanda, entre outras medidas, a declaración da inalienabilidade da auga como ben público e colectivo, o establecemento de iniciativas fiscais e de tarificación que fomenten un consumo racional da auga, que incentiven o aforro e penalicen o desbaldimento, sempre dende a perspectiva da equidade e a xustiza social. Tamén pedimos prohibir a construción de máis centrais hidroeléctricas impedindo tamén os transvases entre bacías, deslindar o dominio público hidráulico e defendelo fronte á súa apropiación para usos privados, establecer e facer cumprir os réximes de caudais ecolóxicos en todos os ríos e o desenvolvemento dun amplo programa de educación e sensibilización cidadá para que os principios e os preceptos da Nova Cultura da Auga sexan asumidos e interiorizados pola nosa sociedade.

Aquí podedes ler o manifesto