A publicación das actas da Comisión Nacional de Bioseguridade pon de manifesto a falta de rigor e o nesgo a favor da industria.

Amigos de la Tierra analizou nun novo informe, as actas da Comisión Nacional de Bioseguridade (CNB), publicadas despois de permanecer ocultas durante anos á opinión pública. A análise das reunións deste órgano supostamente científico que asesora ao Goberno en materia de transxénicos demostra a absoluta falta de rigor e control sobre os cultivos e alimentos modificados xeneticamente, ademais dun evidente nesgo a favor da industria.

"Durante anos a industria intentou construír o mito de que os transxénicos eran os alimentos máis seguros e avaliados da historia. Non obstante, unha análise demostra que esta afirmación é absolutamente falsa" afirmou David Sánchez, responsable de Agricultura e Alimentación de Amigos da Terra.

España é o único país da Unión Europea que permite o cultivo de transxénicos a grande escala, e apoia a súa postura nas decisións da CNB e do seu equivalente europeo, a Axencia Europea de Seguridade Alimentaria (EFSA polas súas siglas en inglés). Mentres, xa son 10 os países da UE que prohibiron o cultivo de millo transxénico, e outros cinco recorreron xudicialmente a aprobación do cultivo da pataca transxénica

Unha análise da composición e traballo destes organismos demostra que se caracterizan pola excesiva proximidade dos seus membros coa industria dos transxénicos que deben regular. No caso do organismo español, a CNB, a lectura das súas actas mostra a desidia e as chapuzas desta Comisión. Ninguén vixía, ninguén fai cumprir a lei e ademais:

• As recomendacións e deliberacións da CNB baséanse con frecuencia en criterios políticos e non en criterios científicos.
• A CNB está claramente nesgada a favor das multinacionais e é extremadamente dura no seu trato á sociedade civil.

• A CNB nin tan sequera sanciona cando as multinacionais incumpren as condicións da autorización impostas pola mesma CNB.

• Dentro do Goberno ninguén quere asumir competencias, responsabilidades e decisións que teñan algunha relación cos transxénicos, deixándoo todo ao criterio da CNB.

"A nova ministra de Medio, Rosa Aguilar, debe abordar este tema de forma urxente. É imprescindible desmantelar a CNB e crear un comité científico transparente, independente e que abranga todos os impactos da liberación de transxénicos ao medio. Pero este debate non pode producirse na situación actual. O primeiro paso necesario é aplicar o principio de precaución e prohibir o cultivo de transxénicos en España, como xa fixeron as principais potencias agrícolas europeas"  engadiu Sánchez.

Informe "Las malas compañías"

Este informe e outros documentos de interese sobre transxénicos poden ser descargados dende a sección de documentación da web  www.amigosdaterra.net