Amigos da Terra e Agareso presentaron hoxe en rolda de prensa a experiencia vivida no Golfo de Fonseca polos cinco reporteiros galegos (Estrella López, Carlos Puga, Eva Alonso, Laura López y Cristóbal Martín), que o pasado 16 de setembro viaxaron rumbo a Centroamérica para visitar os proxectos que Amigos da Terra está levando a cabo en Nicaragua, Honduras e O Salvador.

Durante doce días, os compoñentes desta asociación tiveron a oportunidade de entrevistarse cas cooperativas de pescadores artesanais, con responsables da empresa galega Calvo (que conta con instalacións en O Salvador,), institucións locais, cooperativas de mulleres e as nosas contrapartes, recollendo en formato dixital e a través de entrevistas os logros que se están acadando en diferentes aspectos como a pesca artesanal sostible, a conservación dos recursos mariños ou a maior participación das mulleres no sector pesqueiro.

“En todas las poblaciones que visitamos la palabra gracias, en relación a la cooperación gallega, era una constante en boca de los representantes de las asociaciones y cooperativas puestas en marcha para mejorar la calidad de vida de estas personas” comenta Eva Alonso.

Non obstante, a viaxe non estivo exenta de incidentes. A difícil situación política de Honduras, tras a repentina chegada a Tegucigalpa do presidente deposto Manuel Zelaya, supuxo un varapalo para os reporteiros, que viron, por momentos, frustrada a súa entrada ao país centroamericano debido ao peche de fronteiras, o que os obrigou a modificar toda a súa axenda de traballo á espera de novas noticias. Finalmente, tras case dous días no departamento fronteirizo de Chinandega, en Nicaragua, os cinco reporteiros puideron entrar en Honduras e rematar o seu traballo no Golfo de Fonseca.

O obxectivo deste convenio de colaboración entre ambas asociacións é sensibilizar á poboación galega e difundir o traballo que Amigos da Terra está a realizar en cooperación ao desenvolvemento con enfoque ambiental no Golfo de Fonseca, sempre coa premisa de que a xestión integrada do medio ambiente é a clave para poder erradicar a pobreza no mundo.

Segundo Estrella López, “hemos observado, con gran alegría, que la conciencia medioambiental ha comenzado a formar parte de su vida. Un paso adelante vital para mantener y proteger este riquísimo e impresionante ecosistema”.

O traballo completarase posteriormente con charlas itinerantes en toda Galicia nas que se presentará un documental sobre a vida das comunidades de pescadores do Golfo, ademais dunha exposición fotográfica sobre a viaxe. Entre os sectores aos que se presentará o documental, atópase o sector pesqueiro galego, co obxectivo de sensibilizalo sobre a necesidade de garantir o futuro deste sector en Galicia con actitudes responsables.

Para Judith Sing, responsable de cooperación de Amigos da Terra “esta colaboración marca un precedente xa que por fin a cooperación terá o espazo que se merece nos medios de comunicación e a poboación galega poderá coñecer de primeira man o alcance que teñen os fondos investidos en cooperación ao desenvolvemento".

Máis información