Amigos da Terra participa hoxe mércores 16, dentro da iniciativa Casa Solidaria, coa conferencia, “Xornalismo comprometido no Golfo de Fonseca”, a cargo dos reporteiros de AGARESO (Asociación Galega de Reporteiros Solidarios), que visitaron os proxectos de cooperación que Amigos da Terra está a realizar no Golfo de Fonseca, en Centroamérica. O acto terá lugar ás 20.00 horas, na sala de vídeo da Casa da Xuventude de Ourense.

Durante doce días, os compoñentes desta asociación tiveron a oportunidade de entrevistarse cas cooperativas de pescadores artesanais, con responsables da empresa galega Calvo (que conta con instalacións en O Salvador), institucións locais, cooperativas de mulleres e as contrapartes de Amigos da Terra, recollendo en formato dixital e a través de entrevistas os logros que se están acadando en diferentes aspectos como a pesca artesanal sostible, a conservación dos recursos mariños ou a maior participación das mulleres no sector pesqueiro.

O obxectivo desta colaboración é sensibilizar á poboación galega e difundir o traballo que Amigos da Terra está a realizar en cooperación ao desenvolvemento con enfoque ambiental no Golfo de Fonseca, sempre coa premisa de que a xestión integrada do medio ambiente é a clave para poder erradicar a pobreza no mundo.

Esta conferencia englóbase dentro da iniciativa Casa Solidaria que a vai celebrar ata o 18 de decembro na cidade de Ourense e na que se amosan a labor de dez ONG´s e asociacións ourensáns co obxectivo común de sensibilizar e promover na poboación de Ourense a solidariedade.