O Auditorio Municipal de Lalín acolle durante hoxe e mañá, o Encontro Internacional de Mulleres, no que participan as 150 mulleres rurais, que estiveron nas sesións formativas e onde tamén contaremos coa presenza das mulleres chegadas de Nicaragua, Sri Lanka e Cabo Verde. Este encontro constitúe o acto central do proxecto "As mulleres alimentan o mundo", no que participa Amigos da Terra xunto con A Cova da Terra, Taller de Solidariedade, Panxea, Intermón Oxfam, Axuda en Acción e Solidariedade Internacional.

Esta cita, pretende xuntar á poboación galega con produtoras do sur para debater as problemáticas comúns e plantexar posibles alternativas. Concretamente, búscase atopar sinerxías entre as mulleres do rural galego e as mulleres produtoras do Sur, que participan en proxectos ou iniciativas de comercio xusto; a importancia do papel da muller como provedora de alimentos no Sur e consumidora final no Norte, e a necesidade de abordar a desigualdade de xénero no ámbito da cooperación ao desenvolvemento.

Experiencias de produción no sur

Onte, tivemos a oportunidade de ter no local de Amigos da Terra en Ourense, ás tres mulleres productoras dos países do sur que participan neste Encontro. Eva Pineda, de Aldea Global (Nicaragua), Eranga Samarakoon, de Biofoods (Sri Lanka) e Armanda Moreira da Asociación para o desenvolvemento integral (Cabo Verde), puxeron deste xeito, cara e voz ás persoas que están detrás de algúns dos produtos de comercio xusto que se comercializan no noso país, e explicaron aos técnicos/as e voluntarios/as de Amigos da Terra as súas experiencias como mulleres produtoras e consumidoras, e como cambiou a vida das comunidades ás que representan grazas ás boas prácticas do comercio xusto e o consumo responsable.