A Coordinadora Galega de ONGD , da que forma parte Amigos da Terra emprenderá medidas administrativas e xudiciais, se é preciso, contra as dúas ordes aprobadas o 24 de maio que, unha vez máis, dinamitan a cooperación galega

En dous anos o goberno galego reduce un 48% o orzamento dedicado á loita contra a pobreza mundial

Dous días despois das eleccións municipais do 22 de maio, a Consellería de Presidencia, Administracións Públicas e Xustiza da Xunta de Galicia aprobou, sen previo aviso, dúas ordes que seguen a dinamitar as políticas galegas de cooperación ao desenvolvemento: a eliminación da convocatoria de axudas de emerxencia e acción humanitaria (300.000 €) e a redución a metade do orzamento das convocatoria de proxectos no exterior (1.974.901 €) que, dende o 30 de abril, debería estar resolta.

«Estes novos recortes poñen en cuestión a aposta real do goberno galego pola cooperación internacional», asegurou hoxe María Paz, Vicepresidenta da Coordinadora Galega de ONGD (CGONGD), en rolda de prensa. E é por iso que a as ONGD «esiximos a Xunta de Galicia respecto á cidadanía a través do cumprimento dos acordos políticos de loita contra a pobreza» asinados no II Plan Director de Cooperación Galega 2010-2013 e no Pacto Galego contra a Pobreza. «E, sobre todo, esiximos un posicionamento claro» respecto ao futuro da cooperación en Galicia porque os sucesivos recortes «están a comprometer a vida de milleiros de familias en países empobrecidos como Guatemala, Haití e República Dominicana».

Diante destes novos recortes, a Coordinadora decidiu tomar varias medidas:

- Interposición de recursos administrativos e, no caso que sexa necesario, levar as ordes aprobadas o 24 de maio ao contencioso administrativo.

- Convocar unha Asemblea Xeral Extraordinaria o vindeiro 1 de xullo.

- Informar ao Valedor do Pobo dos recortes aprobados e do incumprimento sistemático da Xunta de Galicia do Plan Anual e o II Plan Director de Cooperación ao Desenvolvemento (2010-2013) así como do Pacto galego contra a Pobreza.

- Solicitar audiencia co presidente da Xunta de Galicia, Alberto Nuñez Feijoo, e co Conselleiro de Presidencia, Administracións Públicas e Xustiza, Alfonso Rueda.

- Concertar reunións con representantes do BNG e PSOE – PSdeG.

A continuación, vos achegamos datos de interese relacionados cor recortes sistemáticos dos últimos dous anos en materia de cooperación:

* A redución total contemplada nas dúas ordes aprobadas o pasado 24 de maio, e publicadas o 3 de xuño no Diario Oficial de Galicia é de 2.274.901 euros: 991.215 en 2011; e 1.283.686 en 2012.

* Os recortes aprobados para este ano respecto o orzamento executado en 2010 son do 34 %, é dicir, de 3.671.178 euros.

* Nos últimos dous anos, a Xunta de Galicia ten reducido un 48 % o orzamento dedicado á loita contra a pobreza. En 2012, os recortes serán aínda maiores porque de momento tense aprobada unha redución de 1.283.686 euros.

* A Xunta de Galicia destina á loita contra a pobreza un 0'065 % do seu orzamento, fronte ao 0'7% contemplado na Lei Galega de Cooperación para o Desenvolvemento e no Pacto Galego contra a Pobreza.

* Galicia continúa a ser a comunidade autónoma que menos orzamento destinou historicamente a cooperación internacional ao desenvolvemento: menos de 4 € por habitante.