Galicia conta con máis de 100 persoas expatriadas traballando en países do Sur. 

 A redución a metade dos orzamentos dedicados a proxectos de cooperación en 2011, deixa sen garantías de coninuidade o traballo a prol da loita contra a pobreza que desenvolve este colectivo.

Hoxe, 8 de setembro, celébrase o Día do/a Cooperante en todo o Estado español. En 2006, o Consello de Ministros aprobou o Estatuto do/a cooperante, un marco normativo reclamado polo sector que marcou un antes e un despois na dignificación da profesión.

Este ano o Día do/a Cooperante vese marcado polo aumento da precariedade laboral do colectivo. En 2011,a Xunta de Galicia reduciu á metade os orzamentos dedicados a financiar proxectos de cooperación no exterior e eliminou a convocatoria de acción humanitaria, unha realidade que está a afectar de xeito directo á estabilidade laboral das persoas expatriadas. A drástica diminución dos recursos comprometidos polo goberno galego dificulta o mantemento dos contratos laborais por parte das ONGD galegas e esto tradúcese na falta de garantías para a continuidade e sustentabilidade dos proxectos de cooperación que se están a levar a cabo en países de América Latina, África e Asia.

E por iso que dende a Coordinadora Galega de ONGD, da que forma parte Amigos da Terra, esiximos á Xunta de Galicia que cumpra os seus compromisos de loita contra a pobreza asinados no II Plan Director da Cooperación Galega e no Pacto Galego contra a Pobreza.

O perfil do persoal expatriado

O labor e traballo a prol da solidariedade entre os pobos está senlleiramente representado polos e polas cooperantes. Segundo o Rexistro de cooperantes elaborado pola Xunta, actualmente hai 103 galegos e galegas traballando no exterior en colaboración coa poboación dos países máis empobrecidos co obxectivo de acadar unha mellor calidade de vida a través da promoción e defensa dos dereitos humanos, da construción de infraestruturas básicas educativas, sanitarias, sociais, etc., e da loita contra a discriminación, a desigualdade de xénero e a inxustiza.

Enténdese por cooperante a aqueles profesionais que traballan no exterior cunha vinculación laboral. Sen esa vinculación laboral non podemos falar de cooperantes, senón de voluntarios/as ou ben de misioneiros/as e relixiosos/as.

O perfil do/a cooperante é unha muller menor de 35 anos, cun perfil especializado, que traballa en América Latina e África e que desenvolve o seu traballo nunha ONG de Desenvolvemento.