Amigos da Terra físoxe eco desta situación a través de veciños concienciados que queren dar fin a unha situación que se prolonga no tempo, xa que non atopan o modo de parar as verteduras en fincas e espazos forestais pertencentes a Cervantes, en Os Ancares, espazo natural protexido pola Rede Natura.

A presión á que se ven sometidas certas áreas naturais fai perigar as cualidades polas que foron inicialmente protexidas, e poñen en serio risco de lumes e contaminación, aqueles lugares onde se atopan os restos esparexados. De entre estes restos localízanse vidro e plásticos, ademais de residuos perigosos procedentes das baterías e fluidos de electrodomésticos.

Se ben as normas din que esas verteduras son “propiedade” do titular da finca onde se agochan, o certo é que son os concellos os encargados de dar as pautas de sensibilización e os medios de xestión do lixo para que os veciños rematen con accións contaminantes e incontroladas como esta.

Por elo, Amigos da Terra busca rematar con esta situación e que os titulares das fincas onde se atopan os residuos leven a cabo a limpeza dos mesmos. Por outro lado, deberan identificarse os autores de tales feitos para imporlles multas económicas que ascenden aos 30.000 euros, segundo a normativa galega de residuos para o abandono de residuos perigosos.