O campionato de Tiro ao Pombiño, que fora suspendido no ano 2008 por non contar con todas as autorizacións preceptivas, estase celebrando nestes días e ata o vindeiro 18 de xullo na Illa de A Toxa.

Aínda que con anterioridade se estudiara a reubicación do campionato por motivos obvios de fraxilidade ambiental da zona, xa que se atopa lindando co humidal protexido Complexo Intermareal Umia – O Grove, vólvese a celebrar no mesmo lugar. Polo tanto, as garantías de seguridade das que teñen que facerse cargo os organizadores do evento e a propia administración son maiores e máis precisas, xa que non só debe quedar altamente protexida a seguridade cidadá senón que se debe garantir a conservación do medio sobre todo co que respecta ás augas do propio humidal que puideran verse afectadas pola munición. Ademais, dita munición debe ser ecolóxica xa que o emprego de munición de chumbo está prohibida debido á alta carga contaminante da mesma.

A petición de información ambiental que fai Amigos da Terra á Subdelegación de Goberno de Pontevedra, vai moito máis aló da mera solicitude das copias das autorizacións pertinentes para a celebración do evento, pedindo a entidade ecoloxista a suspensión deste tipo de campionatos deportivos polo que considera un uso inxustificado e cruel dos animais que morren durante o evento baixo a incorrecta denominación de deporte. Así mesmo, apela á dobre moralidade da administración que, dun lado, autoriza este tipo de matanzas coa agravante da súa execución nun espazo natural protexido polas leis e doutro, fomenta criterios como a solidariedade ou a educación ambiental na sociedade e entre os máis pequenos.

Finalmente, cabe reseñar o artigo 8º do Decreto que regula o réxime xurídico dos humidais de Galicia e que expresamente sinala a prohibición de todas aquelas actividades que se leven a cabo tanto no humidal como na súa zona periférica e que afecten á calidade das augas do humidal, produzan contaminación acústica ou sexan actividades deportivas ou recreativas non compatibles co mantemento das funcións ou valores polo que o humidal protexido se declarou como tal, así como calquera outra actividade non recollida neste precepto pero que poida prexudicar significativamente a conservación de dito humidal.