O Ministerio de Industria ven de publicar a resolución pola que autoriza á empresa Iberdrola, a instalación da central hidroeléctrica de San Pedro II emprazada en Rede Natura 2000, Canóns do Sil. Pola contra, a actual ministra de Medio Ambiente declara que non haberá máis explotacións hidroeléctricas na conca do Miño-Sil.

Foto: estado do río Sil durante as obras da central Santo Estevo II. Xullo 2009

 Na actualidade son obvias as repercusións negativas que a construción e explotación de centrais hidroeléctricas teñen sobre o medio ambiente. A conca do Miño-Sil é unha das máis sobreexplotadas de Galicia e mentras Rosa Aguilar, actual ministra de medio ambiente, adianta o seu compromiso coa protección dos ríos galegos, o Ministerio de Industria, concede a autorización para a instalación da central San Pedro II emprazada na marxe esquerda do río Sil. Tal e como recolle a Declaración de Impacto Ambiental do Ministerio de Medio Ambiente, o proxecto de San Pedro II: “forma parte do Lugar de Interese Comunitario (LIC) Canón do Sil, espazo incluído na Rede Natura 2000, e da Zona de Especial Protección dos Valores Naturais (ZEPVN) Canón do Sil.”

O Ministerio de Medio Ambiente ten diferentes ”opinións” sobre o rexime de concesións hidroeléctricas. O medio ambiente sométese así á concienciación dun político independentemente do grao de afección que cause o proxecto sobre o medio. As recentes declaracións da ministra topan de fronte coas decisións co seu departamento tomou a penas fai un ano respecto a outra concesión no río Sil. Cal é polo tanto, o programa “verde” do partido do goberno?

Amigos da Terra reclama un posicionamento claro do Ministerio de Medio Ambiente que agora di que a canle do río Sil durante as obras da central hidroeléctrica de Santo Estevo  II,  no 2009, estaba seco o que provocou un gran impacto negativo, mentres que fai un ano e medio o mesmo Ministerio indicou que as obras respectaban un caudal que garantía a biodiversidade do río.

 Pola súa parte, a Xunta de Galicia continúa sen aprobar o Plan de Xestión do Lugar de Importancia Comunitaria Canóns do Sil, que suporía bloquear o avance das concesións hidroeléctricas na zona. O Ministerio, pola contra e con meses de retraso, abriu o periodo de consulta do borrador do Plan Hidrolóxico Miño-Sil o que pode servir de base para frear o avance das eléctricas.

Podes consultar a documentación en Amigos da Terra ou pinchando aquí.