A reiteración das denuncias baséase na imprescindible revisión das concesións outorgadas e dos necesarios controis para comprobar o cumprimento dos caudais ecolóxicos dos ríos explotados polas hidroeléctricas.

Recentemente estase tratando o tema da revisión das novas concesións hidroeléctricas sitas nos ríos galegos. Así mesmo, está quedando en interdito o cumprimento dos caudais ecolóxicos por parte das hidroeléctricas, entendendo como tal, o caudal mínimo medioambiental que garante a vida, circulación e reprodución das especies que poboan as augas, capaz de manter o funcionamento, composición e estrutura do ecosistema fluvial.

Fotos: río Sil. 7 de xullo de 2009

Amigos da Terra leva meses reclamando información e documentación sobre a situación na que se atopaba o río Sil durante as obras da central Santo Estevo II, en xullo de 2009. A última das respostas da Confederación Hidrográfica Miño-Sil versaba sobre o caudal ecolóxico que había no río Sil entre os días 5 e 10 de xullo no que Amigos da Terra cursou a primeira denuncia.

Para dar resposta, o Organismo dirixiuse ao Centro de Control de Conca de Oviedo, xa que naquela data non estaba instalado un SAIH (Sistema Automático de Información Hidrolóxica) no río Sil. A Oficina de Planificación Hidrolóxica emitiu un informe no que se recollían distintos datos de interese. Entre eles facíase constar que o “29 de xuño se deixa de turbinar, pasando a ser practicamente nulo o caudal de saída ao río rexistrado polo SAIH (de Oviedo), volvendo á normalidade o 15 de xullo”.

Non obstante, aínda que a resolución que autorizaba as obras da nova central Santo Estevo II dispuña no seu condicionado “que se deberá respectar o caudal de 3360 litros/seg.”, o SAIH detectou “entre os días 30/06/2009 e 15/07/2009 o caudal medido por dito sistema non chega a caudal ecolóxico”. A pesar delo, a Confederación resolve a non incoación de expediente sancionador por “non existen suficientes probas de imputabilidade”.

Amigos da Terra comenta que se se admitira a ilegalidade no funcionamento dalgunhas das centrais hidroeléctricas por incumprimentos medioambientais, non so non mediaría indemnización pola revocación de autorizacións, senón que deberían tramitarse os correspondentes expedientes sancionadores, imporse a reparación polos danos ocasionados ao medio ambiente e finalmente, investigar unha presunta prevaricación polas autorizacións outorgadas a sabendas da ilegalidade nas que as mesmas incorreron.