Co motivo do Día Mundial sen Compras, Amigos da Terra e a Federación Ecoloxista Galega (FEG) solicitan un compromiso político e social para a redución da xeración de residuos, así como un cambio no sistema de xestión que fomente a reutilización na Semana Europea da Redución de Residuos.

A Semana Europea de Redución de Residuos é un proxecto de información e comunicación incluído no marco LIFE e promovido pola Axencia de Medio Ambiente e de Control da Enerxía de Francia e os seus socios europeos: a Asociación de Cidades e Rexións para a Reciclaxe e a Xestión Sostible de Recursos, a Axencia de Residuos de Cataluña, o Instituto de Xestión Ambiental da Rexión de Bruxelas e o Servizo Intermunicipal de Xestión dos Residuos do Gran O Porto, Portugal.

En España, cada cidadá e cidadán producen de media 1,5 Kg de residuos urbanos ao día. Esta é unha cantidade insostible e ilóxica que leva a unha esquilmación de recursos naturais (provenientes de todo o planeta e, en moitos casos, de países empobrecidos), un enorme gasto enerxético na fabricación de novos produtos a partir de materias primas que leva grandes custos ambientais e económicos na xestión dos mesmos unha vez convertidos en residuos.

Desde Amigos da Terra e a FEG solicítase un cambio no sistema de produción e distribución de bens de consumo domésticos, o principal causante da elevada xeración de residuos nas vivendas. Este cambio é de especial importancia nos envases, produtos cunha vida media insignificante e, en moitos casos, innecesaria.

Actualmente os envases son unha ferramenta de publicidade máis para a venda do produto. Perden, deste xeito, a súa utilidade real e non se teñen en conta os impactos ambientais que producen. Por iso, Amigos da Terra e a FEG considera necesaria unha maior intervención das administracións públicas na xestión de envases, onde se priorice a protección do medio ambiente fronte á estética e a promoción de marcas.

Existen moitas alternativas ao sistema de distribución actual. A compra pódese realizar a granel ou en menos envases e menos prexudiciais para a nosa contorna. Os cidadáns e cidadás deben poder elixir entre estas opcións. As administracións deben traballar xunto cos envasadores e distribuidores para volver aos sistemas de reutilización de envases. Con iso conséguese un importante aforro enerxético, de auga e de recursos naturais.