Amigos da Terra colabora coa Concellaría de Medio Ambiente de Marín na posta en marcha dunha nova Campaña de Sensibilización Ambiental nas praias deste municipio, co obxectivo de concienciar á cidadanía sobre a necesidade de coidar  os areais e os seus ecosistemas. A iniciativa da comezo hoxe na praia de Portocelo.

A campaña que se prolongará durante todo o mes de agosto, percorrerá cada venres un areal distinto, dando a coñecer aos cidadáns os sistemas de mellora implantados ata o momento, como o Certificado EMAS (Sistema Comunitario de Xestión e Auditoria Medioambientais), e informándolles sobre a necesidade de colaboración de todos/as na conservación destas zonas. Deste xeito, estaremos presentes nas praias de Portocelo, Mogor, Aguete e Loira en horario de 17.30 a 19.30 horas.

En cada un dos areais contaremos cun posto informativo no que sensibilizaremos e informaremos aos cidadáns sobre a necesidade de coidar destas zonas e poremos a súa disposición guías de separación selectivas, trípticos da campaña, cinceiros de praia para as cabichas e colectores de pilas.

Ademais, na beira da carpa teremos unha zona de ocio para todos os públicos, na que realizaremos obradoiros con refugallos, elaboraremos e poremos en funcionamento un forno solar e xogaremos co “twister dos residuos”, a través do cal comprobaremos se sabemos separar ben os residuos na praia.

Así mesmo, faremos unha pequena enquisa aos usuarios das praias co fin de coñecer a súa percepción sobre a necesidade de protección destes ecosistemas e comprobar o seu coñecemento sobre as problemáticas ambientais.