Amigos da Terra denuncia a falta de transparencia e a política de “feitos consumados” da Consellería de Medio Ambiente na xestión de residuos. A pesar de que o período da cidadanía para presentar alegacións ao Plan de Residuos xa rematou, Agustín Hernández amósase disposto a “adaptar o plan de residuos á proposta dunha empresa”. Así mesmo, para a asociación resulta escandaloso que a Xunta de Galicia aproveite o concurso eólico para insinuar a concesión dunha planta de xestión de residuos á empresa “Estela Eólica”.

Dende a asociación entendemos que este comportamento antidemocrático só atende a que a Consellería de Medio Ambiente, Territorio e Infraestruturas atópase sen ideas e dedícase a confundir e dar as costas á cidadanía a través dunha política de “feitos consumados”. Unha política na que, segundo as últimas declaracións de Javier García, administrador de Estela Eólica: “a empresa xa ten establecido contactos con concellos na zona sur de Galicia”, e se da por suposto que se fará a planta, a pesar de que aínda non se aprobou o Plan de Residuos e polo tanto non se coñecen os criterios a seguir na xestión de residuos en Galicia.

Lamentable confusión entre a Xunta de Galicia e a empresa Estela Eólica

Mentres que Agustín Hernández mantén o seu desexo de que a planta conte con incineración, Javier García, administrador de Estela Eólica, nega que a empresa vaia a contar con valorización enerxética, e tampouco con planta de compostaxe. Unhas declaracións que reflexan a falta de criterio que teñen tanto a Consellería de Medio Ambiente como a empresa eólica á hora de emprender un proxecto tan importante en materia medioambiental para Galicia.

Amigos da Terra entende que estes intentos de confundir e distraer as galegas e galegos teñen que rematar. "Galicia ten un problema cos residuos orgánicos (50% do total), e a única maneira ambientalmente sostible de solucionalo é apostar pola compostaxe e facelo de forma descentralizada. As outras alternativas, incineración ou vertido constitúen unha volta ás políticas obsoletas e contaminantes do pasado" declara María Durán, responsable da área de residuos de Amigos da Terra.

A asociación ecoloxista lembra que a creación dunha nova planta incineradora no sur de Galicia non é a solución adecuada para a xestión do gran volume de residuos xerados na nosa comunidade e pide un cambio de dirección no modelo que a Xunta de Galicia propón no plan de residuos. Así mesmo, agardamos que as nosas alegacións ao plan sexan tidas en conta e a Xunta aposte pola compostaxe descentralizada.

Que modelo de xestión de residuos queremos para Galicia ?

O goberno galego aposta polo modelo danés, que non conseguiu conter a xeración de residuos (801kg/persoa e ano, récord europeo) nin as emisións e riscos da queima do lixo (427kg/persoa e ano son enviados a incinerar).

Pero lonxe deste modelo, existen en Europa rexións que están a xestionar os seus residuos minimizando a incineración. A rexión de Flandes en Bélxica, é o espello no que a Xunta que Galicia se debe mirar de cara ao futuro. Esta rexión conseguiu reducir nun 73% a xeración de residuos entre 1996 e 2006 e segundo datos do 2007, recicla e composta o 75% dos seus residuos.

Dende Amigos da Terra propoñemos que en Galicia se faga unha aposta decidida pola redución na xeración de residuos, lonxe do escaso 10 % que establece o novo plan de residuos de Galicia de cara a 2020. Así mesmo, reclamamos para Galicia unha aposta clara pola compostaxe seguindo ao exemplo da rexión belga de Flandes,  e a descentralización na xestión de residuos como as mellores solucións para este problema.