A empresa Leite Río S.L. provoca dous verquidos que causan a morte de miles de especies piscícolas (troitas, bogas e anguias) ao río Tórdea na localidade de Veiga de Anzuelos en Sarria (Lugo) pola mala depuración das augas residuais que chegaron ao río e afectaron gravemente á fauna do mesmo.

Dúas sentenzas avalan a presenza de verquidos contaminantes no río, unha da Audiencia Provincial de Lugo de maio de 2007, e outra, do Tribunal Supremo (Sala Penal) de abril de 2008. Tanto unha como outra, afirman que os feitos son constitutivos de delito contra os recursos naturais e o medio ambiente previsto e penado nos artigos 325 e 326.b) do Código Penal. E os feitos son así cualificados porque as probas pericias e as dilixencias de investigación que arrancaron co SEPRONA, arroxan uns dados que reflicten que se provocou unha situación “incompatible coa vida dos peixes” e unha “forte alteración do hábitat dos peixes” (STS 141/2008, de 8 de abril).

Os parámetros alterados que causaron a mortandade dos peixes, teñen a súa orixe nas augas residuais provintes do verquido do colector da empresa provocando unha coloración branqueciña nas augas do río.

Fonte: J.M. Ramos. Río Tordea

Por este primeiro verquido, o administrador e representante da empresa foi acusado de incorrer dolosamente e de forma cualificada, nun delito contra os recursos naturais e o medio ambiente polo que a Audiencia de Lugo o condenou a unha pena de 4 anos prisión, inhabilitación especial por 3 anos para desempeñar o cargo de administrador dunha empresa, multa de 300 euros diarios e abono de 24000 euros á Consellería de Medio Ambiente en concepto de danos á fauna.

O acusado recurriu elevando a casación ao Tribunal Supremo que dictaminou a pena de prisión de dous anos “como autor dun delito contra o medio ambiente xa definido”. O alto tribunal considerou a rebaixa da pena con respecto á Audiencia Provincial de Lugo. Carecendo de antecedentes penais, o acusado e autor dos feitos non ingresou en prisión e a morte de 3000 exemplares (1526 troitas, 1471 bogas e 3 anguias) causando un grave dano ecolóxico ao curso fluvial, saldouse co pago dunha sanción económica.

Quizáis foi esa facilidade á hora de non cumprir condena en prisión a que levou a cometer o mesmo acto en agosto do 2002 polo que agora se enxuiza no Xulgado do Penal de Lugo. Existindo, igual que no primeiro caso, proba pericial que conclúe que o responsable da empresa enfróntase a un delito medioambiental pola morte de 83 bogas e 1818 troitas do río Tórdea.

Amigos da Terra considera unha mofa á xustiza e á lexislación ambiental a actuación do responsable da empresa causante da contaminación ao río Tórdea por dúas ocasións. A reiteración dos danos debera ser considerada unha circunstancia agravante polo que a posible imposición dunha pena de prisión de 3 anos, é considerada por Amigos da Terra insuficiente para crear un efecto disuasorio á hora de cumprir coas normas que interveñen no proceso de bo mantemento da depuradora da empresa onde se orixinou o verquido capaz de “alterar significativamente o ecosistema fluvial”, declarou o Ministerio Fiscal.

Directiva relativa á protección do medio ambiente mediante o Dereito penal

Esta norma aprobouse en Europa en maio de 2008 e antes de decembro do 2010 debe trasporse ao dereito español e promove que os Estados membros se aseguren de que certas conductas sobre o medio ambiente, sexan constitutivas de delito, se cometan dolosamente ou por imprudencia grave.

Joomla Templates and Joomla Extensions by ZooTemplate.Com